اک شہر آرزو

قدرت اللہ شہاب نے کہا تھا : "چندراوتی سے جب مجھے عشق ہوا تو اس کو مرے ہوئے تین دن ہوچکے تھے "۔ ہمیں بھی کراچی سے عشق اس وقت ہوا جب اسے چھوڑے ہوئے ہمیں عرصہ بیت چکا تھا ۔ اس تعبیر کے لیے منیر نیازی مرحوم کا سہارا لیتے ہیں ۔

محبت اب نہیں ہوگی یہ کچھ دن بعد میں ہوگی

گزر جایئنگے جب یہ دن یہ ان کی یاد میں ہوگی

محبت ان لمحوں سے نہیں ہوتی جنہیں بعد کی زندگی میں ہم اپنی زندگی کا حاصل سمجھتے ہیں ،ان کی یاد سے ہوجایا کرتی ہے ۔ وہ لمحے جو ذہن کے کینوس پر ایک دائمی یاد بن کر نقش ہوجاتے ہیں اس مصور کے شاہکار کی طرح جس  کے ہاتھ اس کے بعد قلم کردیے گئے ہوں ۔